கனேடிய தொலைக்காட்சிக்கு இலங்கை அரசின் கட்டுப்பாடு.

கனடாவில் சனல் 3 இல் இயங்கி வரும் குளோபல் தொலைக்காட்சியின் செய்தியாளர் ஒருவர் இலங்கையில் சுனாமியின் பின்னரான மீளமைப்பு முயற்சிகள் குறித்து விவரணம் ஒன்றினைத்தயாரிப்பதற்காக இலங்கை விஜயம் செய்ய வீசாவுக்கு விண்ணப்பித்தபோது கனடாவில் உள்ள இலங்கைத் தூதரகம் அவருக்கு வீசா வழங்க கடுமையான விதிமுறைகளை விதித்துள்ளது.

அவர் தயாரிக்கும் விவரணத்தினை அவர் இலங்கையினை விட்டு வெளியேறும் முன்னர் இலங்கைரூபவாகினி கூட்டுத்தாபனத்திலும் ,இலங்கை திரைப்படக் கூட்டுத்தாபனத்திலும் கொடுத்து அனுமதிபெற வேண்டும் என்பதுடன் விவரணத்தின் இறுதிப் பிரதியினை கனடாவிலுள்ள இலங்கை தூதரகத்தில் சமர்பித்து அவர்களின் அனுமதியினை பெறவேண்டும் என்பதே அந்த நிபந்தனையாகும்.

சுனாமி தாக்கத்தின் பின்பு கனேடிய ஊடகங்களில் இலங்கை செய்திகளுக்கு முக்கியத்துவம் கொடுக்க தொடங்கியுள்ளதுடன் அதைவிட பாதிக்கப் பட்ட தமிழ் பகுதிகளுக்கு அரசு ஒன்றுமே செய்யவில்லை என்பதும் வெளிவந்து விடலாம் என்பதுமே காரணமாக இருக்கலாம். குளோபல் தொலைகாட்சியின் இச் செய்தியாளர்ஒரு நடுநிலையான பக்கச்சார்பற்ற செய்தியாளர் என்பதினை இதைக் கொண்டே ஊகிக்கலாம்.இலங்கை அரசுக்கு சார்பான செய்திகளை கொடுப்பவராக இருந்தால் இப்படி நிபந்தனைகளுக்கு இடமே இருந்திருக்காது. இலங்கை அரசினை பொறுத்தவரை வெளிநாட்டு பணம் வேணும் ஆனால் வெளிநாட்டு ஊடகங்கள் தேவையில்லை அவை நடுநிலையாக இருக்கும் பட்சத்தில்.

தமிழீழ தேசத்தின் தேசிய தொலைக்காட்சி

நேற்றைய தினம் தாயகத்தில் இருந்து NTT எனும் பெயரில் கார்த்திகைப் பூவை இலட்சினையாக கொண்டு தமிழீழ தேசிய தொலைக்காட்சியானது தனது ஒளிபரப்பு சேவையை ஆரம்பித்துள்ளது.தற்போது ஜரோப்பாவில் இருந்து இயங்கிவரும் தமிழ் தொலைக்காட்சி இணையத்தினூடாக(TTN) தனது சேவையை ஆரம்பித்திருக்கிறது.விரைவில் உலகின் பல பாகங்களிலும் ,ஆசியாஉட்பட தமிழீழ தேசிய தொலைக்காட்சி சேவையினைக் கண்டு களிக்கலாம் எனவும் தெரிவிக்கப்பட்டுள்ளது.

முழுப்பூசணியை சோற்றில் மறைத்தாலும்.....

மூக்கு உடைபடுவது என்பார்களே அதனை நன்றாகவே அனுபவித்திருப்பார் இலங்கையின் இராணுவபேச்சாளர் பிரிகேடியர் தயா ரத்னாயக்கா

கடந்த ஞாயிற்றுக்கிழமைகொழும்பில் இருந்துவெளிவரும் "சண்டே லீடர்" ஆங்கிலப் பத்திரிகை
கருணா குழுவினரின் முகாம் ஒன்று வெலிகந்தைப்பகுதியில் இலங்கை இராணுவத்தின் ஒத்துழைப்புடன் இயங்கி வருவதாக புகைப்பட ஆதாரங்களுடன் செய்தி வெளியிட்டு இருந்தது. அதன் செய்தியாளர் நேரடியாக சென்று பார்த்துஅதனை எழுதியிருந்தார்.

இருந்தும் அதனை அடியோடு நிராகரித்தார் இராணுவப் பேச்சாளர். தமது பகுதிகளில் அப்படி ஒரு முகாம் இல்லைஎன பி.பி.சி க்கு கூட தெரிவித்திருந்தார்.அனால் இன்றைய செய்தி என்னவென்றால் எந்தப் பகுதியில் கருணா குழுவினரின் முகாம் இல்லை என்றாரோ அந்தப் பகுதியில் மோதல்கள் இடம்பெற்று அம் முகாமுக்கு பொறுப்பாக இருந்தவர் காயமடைந்து வைத்தியசாலையில் அனுமதிக்கப்பட்டிருக்கிறார்.இதன்பின்னர் என்ன சொல்லப்போகிறார் இராணுவ பேச்சாளர்.?

அனானுக்குப் போட்ட தடை அம்மாவின் அம்மா காட்டிய நடைமுறையே!

அனானுக்குப் போட்ட தடை அம்மாவின் அம்மா காட்டிய நடைமுறையே!

ஜ. நா. செயலாளர் நாயகம் கொபி அனான் வடபகுதிக்கு வராமலேயே திரும்பச்சென்று விட்டார். ஏன் வரவில்லை என்பதற்கு ஒவ்வொருவரும் ஒவ்வொரு காரணம் சொல்லுகின்றனர்.அனான் வடபகுதிக்குச் செல்வதை சிங்கள பௌத்த மேலாண்மை அனுமதிக்காதென்பது முன்னரே தெரிந்ததுதான்.இதனால்தான் கடைசி நிமிடம்வரை தமிழ்மக்கள் தரப்பில் சுனாமி அனர்த்தத்தால் பெரும் அழிவுகளுக்குள்ளான வடக்கு - கிழக்குப் பகுதிகளையும் நேரில் வந்து பார்த்துப்போகும் படி கோரிக்கை விடுத்துவந்தனர். கொபி அனான் பார்க்க வேண்டிய அனர்த்த அழிவுகளை விட சிங்களபௌத்த ஆதிக்க சக்திகளின் “அனர்த்தங் களை” இன்று உலகம் முழுவதும் அறிந்துகொள்ள முடிந் திருக்கிறது.

இது இப்பொழுது சந்திரிக்கா ஆட்சியில்தான் இலங்கை யில் நடந்திருக்கும் சம்பவமல்ல.1970 ஆம் ஆண்டுகளில் கொழும்பில் சர்வதேச நாடாளு மன்ற பிரதிநிதிகளின் மாநாடொன்று நடந்தது.கொழும்பில் பண்டாரநாயக்க நினைவு மண்டபத்தில் நடந்த இந்த மாநாட்டுக்கு உலகின் பல நாடுகளையும் சேர்ந்த நாடாளுமன்ற சபாநாயகர்கள் பிரதிநிதிகள் என்று பலரும் அழைக்கப்பட்டிருந்தனர். அந்தச் சமயம் இலங்கையில் சந்திரிகாவின் அம்மா சிறிமா பண்டாரநாயகாவின் அரசு ஆட்சியிலிருந்தது. அந்த மாநாட் டில் இலங்கையின் எதிர்க்கட்சித் தலைவராக இருந்த ஜே. ஆர். ஜெயவர்த்தனாவும் கலந்துகொண்டார். இந்தியாவில் எதிர்க்கட்சித் தலைவராக இருந்த வாஜ்பாயும் கலந்து கொண்டார்.

மாநாட்டில் கலந்துகொண்ட இலங்கைத் தமிழ் அரசுக் கட்சி நாடாளுமன்ற உறுப்பினர்கள் வாஜ்பாயைச் சந்தித்துப் பேசி தமிழர் தாயகத்துக்கும் அவர் இந்தச் சந்தர்ப்பத்தில் சென்று பார்வையிடவேண்டுமென்று கேட்டுக் கொண்டனர்.இதற்கு வாஜ்பாயும் சம்மதம் தெரிவித்தார். மாநாடு முடிவடைவதற்கு முன் பிரதிநிதிகள்; நாட்டில் விரும்பிய இடங்களுக்குச் சென்று பார்த்தும் பேசுவதற்கும் வழக்கம்போல ஒழுங்கு செய்யப்பட்டிருந்தது.

வாஜ்பாயும் மற்றும் சிலரும் யாழ்ப்பாணம் செல்வதற்கு ஒழுங்குசெய்யப்பட்டது.கொழும்பிலிருந்து விமானத்தில்
வாஜ்பாய் குழுவினருடன் தமிழ் அரசுக்கட்சியைச் சேர்ந்த வி.என்.நவரத் தினமும் மற்றும் இரண்டொருவரும் யாழ்ப்பாணம் வந்தனர்.
வாஜ்பாய் குழுவைத் தமிழரசுக் கட்சியினரே யாழ்ப் பாணம் அழைத்துவருவதாகவே இந்த ஏற்பாடு அமைந் திருந்தது.வெளிநாட்டுப் பிரமுகர்கள் ஒரு நாட்டுக்கு வந்தால் அவர்களுக்கு வழிகாட்டியாகவும் அவர்களின் நலன்களைக் கவனிப்பதற்கும் அரசாங்கத்தின் பிரதிநிதியொருவர் நியமிக்கப்பட்டிருப்பார். இவரை புரட்டக்கோல் என்று அழைப்பார்கள். வாஜ்பாய் குழுவுக்கும் ஒரு புரட்டக்கோல் பொறுப்பாக விமானத்தில் அவர்களுடனேயே வந்தார்.

யாழ்ப்பாணத்தில் பலாலி விமான நிலையத்தில் வந்திறங்கியதும் அவர்களுக்கு ஒரு தேநீர் விருந்துக்கு ஏற்பாடு செய்யப்பட்டிருப்பதாகவும் தமிழரசுக் கட்சி எம்.பி.வி.என்.நவரத்தினம் வாஜ்பாயிடம் சொல்லித் தங்களுடன் வருமாறு அழைத்தார்.
இதே விமானத்தில் வந்த அரசின் புரட்டக் கோல் அதற்கெல்லாம் நேரமில்லையென்றும்
தங்களுடனேயே வாஜ்பாய் குழு நிற்க வேண்டுமென்றும் வேறு எந்த நிகழ்ச்சிக்கும் செல்வதற்கு இடமில்லையென்றும் தெரிவித்து வாஜ்பாய் குழுவை தம்முடன் வருமாறு கேட்டார்.வாஜ்பாய் எதுவும் சொல்ல முடியவில்லை. இப்பொழுது கொபி அனான் சொன்னதுபோல இவரும் அரசின் விருந்தின ராகவே வந்திருந்தார்.விமான நிலையத்தில் வி.என்.நவரத்தினத்திடமும் தமிழரசுக்கட்சி எம்பிக்களிடமும் வாஜ்பாய் பிரியாவிடை பெற்றார்.

நான் அடுத்தமுறை தனிப்பட்ட முறையில் யாழ்ப்பாணம் வருவேன். அப்பொழுது தமிழ்மக்களையும் அவர்கள் வாழும் இடங்களையும் பார்ப்பேன். அவர்களுடன் பேசுவேன் என்று சொல்லி விடைபெற்று புரட்டக்கோலுடன் சென்றார்.
வாஜ்பாய் அதன்பின் தனிப்பட்ட முறையிலும் வரவில்லை. பிரதம மந்திரியாக பதவியேற்ற பின் உத்தியோக ரீதியிலும் யாழ்ப்பாணம் வரவில்லை! யாழ்ப்பாணமே அவருக்கு நினைவிருக்காது.வாஜ்பாய் வந்த காலத்தில் இங்கு விடுதலைப் புலிகள் இருக்கவில்லை. போர்க்களமும் இருந்ததில்லை. இந்தியா வின் காந்தி காட்டிய வழியில் அகிம்சையைப் பின்பற்றிய செல்வநாயகம் தலைமையில் ஜனநாயக வழியில் சென்ற இலங்கைத் தமிழ் அரசுக்கட்சி;தான். தமிழர் தாயகத்தில் மக்களுக்கு வழிகாட்டிக் கொண்டி ருந்தது.

அன்றைக்கு அம்மாவின் ஆட்சியிலேயே வாஜ்பாய் யாழ்ப்பாணத்தில் தமிழ் மக்களைப் பார்த்துப்போகவும் பேசவும் தேநீர் விருந்தில் தமிழர்களின் விருந்தோம்பலை ஏற்கவும் இடமிருக்கவில்லையென்றால் இன்று சுனாமி அனர்த்தத்தின் பின் மகள் சந்திரிகா அனுமதிப்பாரா?

இதுமட்டுமல்ல 1950 ஆம் ஆண்டுகளில் தொண்டமானாறிலிருந்து இந்தியாவின் கோடிக்கரைக்கு நவரத்தினசாமி என்ற நீச்சல் வீரன் முதல் தடவையாக நீந்திச் சென்று உலக சாதனை படைத்தார்.இந்தச் சாதனையைப் பெரும் தயக்கத்துடன் பலநாட்கள் கழித்து இலங்கையில் அன்று ஆட்சியிலிருந்த சேர்.ஜோன் கொத்தலாவலையின் ஐக்கிய தேசியக் கட்சி அரசு பாராட்டுத் தெரிவித்தது.இதன்பின் பிரதமர் சேர்.ஜோனின் வாசஸ் தலத்தில் நடந்த ஒரு வைபவத்தில் நீச்சல் வீரன் நவரத்தினசாமியை பிரதமர் வரவேற்றுப் பாராட்டுவதற்கு சம்மதம் தெரிவித்திருந்தார். நீச்சல் வீரனும் அங்கு சென்றிருந்தார். ஆனால் அந்த நிகழ்ச்சியில் பிரதமர் நவரத்தினசாமியைக் கைகுலுக்கிப் பாராட்டுவதை புகைப்படம் எடுப்பதற்கு அனுமதிக்கவே மறுத்து விட்டார்கள்.

இது தான் சிங்கள பௌத்த மேலாண்மை வாதிகள் தமிழ் மக்களுக்குக் கொடுக்கும் மதிப்பும் மரியாதையும் இதைத்தான் அவர்கள் இன மத மொழி பாகுபாடற்ற ஒரு மைப்பாடு என்று சொல்லுகிறார்கள்.இன்றும் இலங்கை மக்கள் மத்தியில் சுனாமி பேரலைகள் பேதங்கள் எல்லாவற்றையும் நீக்கிவிட்டதாகச் சொல்லி உலகையே ஏமாற்றுகிறார்கள்.அவர்களுக்கென்று ஒரு நாடு இருக்கிறது. அவர்களுக்கான மொழி அரச மொழியாக இருக்கிறது. அவர்கள் சொல்வதை உலகமும் நம்பும்.சிங்கள பௌத்த மேலாண்மைவாத ஊடகங்கள் இயற்கை அனர்த்தத்தை மறந்துவிட்டதாகவே நடந்து கொள்கின்றன.

கையேந்திப் பிச்சை எடுக்கும் நிலையிலிருந்த சந்திரிகா அரசுக்கு சுனாமி பேரலைகள் உதவி என்ற பெயரில் அள்ளிக்கொடுக்கும் கொடை வள்ளலாகவுமிருக்கின்றது. ஜே.வி.பியின் விமல் வீரவன்ச இதுதான் புலிகளைப் பேச்சுக்கு இழுக்கவேண்டிய தருணம் என்று அலோசனை சொல்கிறார்.அஸ்கிரிய பீடாதிபதியும் அனுஸானம் வழங்குகிறார். எல்லாமே இலவசமாக வந்து கொட்டும்போது சுனாமியின் பேரழிவில் மாண்டவர்களைப் பற்றியோ உறவுகளைப் பலிகொடுத்து பதறி நிற்கும் மக்களைப் பற்றியோ இவர்க ளுக்கென்ன கவலை?

நாங்கள் மட்டுமென்ன? இழந்த தமிழீழ அரசை மீண்டும் அமைப்பதற்கு 1977 இல் தமிழ் மக்களிடம் ஆணைகேட்டுப் பெற்று. நாடாளுமன்றத்தில் ஆறாண்டுகள் பதவி வகித் தோம். கடந்த பொதுத் தேர்தலில் நாடாளுமன்றப் பதவிக்குத் தேர்தலில் போட்டியிட்டுத் தோற்றதால் வெற்றி பெற்றவர்கள் நியாயமான முறையில் வெற்றிபெறவில்லையென்று நீதி மன்றக் கதவைத் தட்டி தடுத்துநிற்கிறோம். ஆனாலும் எனக் குப் பதவி ஆசை இல்லையென்று இன்றும் சங்கூதிக்கொண்டு சகுனிவேலை செய்து கொண்டிருக்கிறோம்.இப்படிப்பட்டவர்களும் நம்மிடையே இருக்கும்போது மற்றவர்களைச் சொல்லி என்னபயன்?

நன்றி:- ஈழநாடு

மீண்டும் யாழ்பாணத்திலிருந்து "சிரித்திரன்"

சிறு வயதில் என்னை ஆனந்தவிகடன் எப்படி நகைச்சுவையால் மகிழ்வித்ததோ அதற்கு சற்றும் குறையாமல் மண் வாசனையுடன் மகிழ்வித்தது யாழ்பாணத்தில் இருந்து வெளிவந்த"சிரித்திரன்" இதழ் .

திரு எஸ்.சிவஞானசுந்தரத்தினால் வெளியிடப்பட்ட அந்த நூலில் இடம்பெற்ற கருத்தோவியங்கள் காலத்தால் மறக்கமுடியாதவை. சிரிக்க வைத்ததுடன் மக்களை சிந்த்திக்கவும் வைத்தவை. கார்ட்டூன் என்பதை கேலிச்சித்திரம் என்று தமிழ்நாட்டிலிருந்து வரும் இதழ்கள் பயன்படுத்திய காலங்களில் கருத்தோவியம் என்று அதற்குரிய சரியான சொல்லை அறிமுகப்படுத்தியதுடன் இன்றும் ஈழத்தில் கருத்தோவியம் என்ற சொல் புழங்கி வருவதற்கும் காரணி திரு.எஸ்.சிவஞானசுந்தரம் ஆவார்.

மண்வாசனையுடன் வந்த அவரின் படைப்புக்களான சவாரித்தம்பர் என்ற கருத்தோவிய கதாபாத்திரம்,மற்றும் சின்னக்குட்டி,மைனர் மச்சான், மிஸ்டர் அண்ட் மிஸிஸ் டாமோதரம், மகுடியார் ,மெயில் வாகனத்தார்,ஷீமான் செல்லக்கிளி, வேலரும் மயிலரும் இன்றும் பல ஈழத்தவரின் மனத்தில் நிலைத்து நிற்பவை.

இதில் மைனர் மச்சான் பாத்திரமானது அந்த கால படித்தவேலையற்ற ஈழத்து இளைஞனை பிரதிபலித்த ஒருபடைப்பாகும். வேலைதேடும் ,அதில் தோல்விகளையே சந்தித்த ஒருவர்.காதலுக்கு தூண்டில் போடும் அவருக்குகாதலிலும் வெற்றிகிட்டாது.இடையிடை மது பாவித்து விட்டு புலம்பும் அவருக்கு அந்த்த காலத்தில்பிரபலமான பெல்பொட்டம் பாண்டும் ,காலர் பெரிதான உடலை இறுக்கும் சேட்டும் ,நீண்ட தலை முடியும் வரைந்திருப்பார் திரு சுந்தர்.

"செய்யும் தொழிலே தெய்வம் சிரிப்பே சீவியம்" என்னும் வாசகங்களுடன் வெளிவந்த சிரித்திரன் சஞ்சிகைசுந்தரின் மறைவின் பின்னர் வெளிவரவில்லை. தற்போது சில வருட காலத்தின் பின்னர் மீண்டும் சிரித்திரன் சஞ்சிகையானது வெளிவர இருக்கிறது எனும் ஒரு நற்செய்தியை அறியமுடிந்தது. மீண்டும் ஈழத்தவரின் கரங்களில் தவழும் சிரித்திரன் இதழானது முன்னைப் போலவே தரத்திலும்,சமூக முன்னேற்றத்திலும் அக்கறையாக இருக்கும் என நம்பலாம்.

மதத்தீவிரவாத பேராபத்து.!

நேற்றைய தினக்குரல் பத்திரிகையின் ஆசிரியத்தலையங்கம் இது. தேவை கருதி அதை இங்கு மீண்டும் பிரசுரித்திருக்கிறேன். நன்றி- தினக்குரல்

கொழும்பு குதிரைப் பந்தய திடலில் கடந்த சனிக்கிழமை இரவு பிரபல இந்தி நடிகர் ஷாருக்கான் குழுவினரின் நிகழ்ச்சியின் இறுதியில் இளவயதினர் இருவரைப் பலிகொண்டு பலரைக் காயமடையவைத்த கிரனேட் தாக்குதல் சம்பவத்துக்கு அரசாங்கமே பொறுப்பேற்க வேண்டுமென்று எதிர்க்கட்சியும் எதிர்க்கட்சியின் முக்கிய அரசியல்வாதி ஒருவரே பின்னணியில் இருந்ததாக அரசாங்கமும் பரஸ்பரம் குற்றச்சாட்டுக்களைத் தெரிவித்த வண்ணமிருக்கின்றன.

அந்த நிகழ்ச்சியை நடத்தவிடாமல் தடுப்பதற்கான பிரயத்தனமாக பௌத்த பிக்குமார் மேற்கொண்ட உண்ணாவிரதப் போராட்டம் மற்றும் ஆர்ப்பாட்டங்களுடன் தங்களுக்கு எந்தத் தொடர்பும் கிடையாது என்று ஜாதிக ஹெல உறுமயவினர் இப்போது கூறுகிறார்கள்.
திருமதி குமாரதுங்க தனது ஜனாதிபதி பதவியின் 10 ஆண்டுகள் பூர்த்தியை முன்னிட்டு மாத்தறையில் நேற்று முன்தினம் ஞாயிற்றுக்கிழமை நடைபெற்ற வைபவமொன்றில் உரையாற்றுகையில் நேர்மையான மார்க்கத்தில் மக்களின் ஆணையைப் பெற்று அதிகாரத்துக்கு தங்களால் வரமுடியாதென்பதை உணர்ந்து விட்ட ஐக்கிய தேசியக் கட்சி அரசியல்வாதியொருவர் தனது குண்டர்களைப் பயன்படுத்தி நாட்டில் அச்சத்தையும் வன்முறைகளையும் மூளவைக்கும் முயற்சிகளில் இறங்கியிருக்கிறார் என்று முற்றிலும் கட்சி அரசியல் உணர்வுடனான குற்றச் சாட்டொன்றை முன்வைத்திருக்கிறார்.

கிரனேட் தாக்குதல் சம்பவத்தைக் கடுமையாகக் கண்டனம் செய்திருக்கும் இந்திய அரசாங்கம் இலங்கைப் பொலிஸாரின் விசாரணை முடிவுகளுக்காகக் காத்திருப்பதாக அறிவித்திருக்கிறது.
உண்மையிலேயே அரசாங்கமோ அல்லது எதிர்க்கட்சியோ குதிரைப் பந்தயத் திடல் கிரனேட் தாக்குதல் சம்பவத்துக்கு வழிவகுத்த அரசியல்-மதவாதப் பின்னணிகளை உகந்த முறையில் நோக்குவதற்குத் தயாராயில்லை; மாறாக, அந்தப் பின்னணிகளின் ஆரோக்கியமற்ற தன்மைகளை மூடிமறைத்து தங்களுக்கு அரசியல் ஆதாயத்தைத் தேடும் வக்கிர உணர்வுடனேயே அவை செயற்பட்டுக் கொண்டிருக்கின்றன.

இலங்கையின் பாராளுமன்ற அரசியலில் பௌத்த பிக்குமாரின் வெளிப்படையான பிரவேசத்தினால் தோன்றியிருக்கும் தற்போதைய சர்ச்சைகளைவிட மிகவும் கூடுதலான அளவுக்கு செல்வாக்கைச் செலுத்தி அரசியலில் மதவாதத்தை முனைப்புடன் முன்னெடுக்கக் கூடியவராக வந்திருக்கக் கூடிய கங்கொடவில சோம தேரரின் முதலாவது நினைவு தினத்தன்று ஷாருக்கான் குழுவினரின் களியாட்ட நிகழ்ச்சி நடத்தப்படக் கூடாது என்ற பௌத்த பிக்குமாரில் ஒரு பிரிவினரின் கோரிக்கையே அன்றைய அசம்பாவிதங்களுக்குக் காரணம்.

இலங்கை அரசியலில் பின்னணியில் இருந்து பிக்குமார் செல்வாக்கைச் செலுத்தி ஆட்சியாளர்களின் நடத்தைப் போக்குகளைத் தீர்மானித்து வந்திருக்கிறார்கள் என்ற போதிலும், அண்மைக் காலமாக அவர்களில் ஒரு சாரார் காண்பிக்க ஆரம்பித்திருக்கும் நேரடி அரசியல் ஈடுபாடு ஏற்கெனவே ஆரோக்கியமற்றதாக இருக்கும் தென் இலங்கை அரசியல் அரங்கில் மேலும் இருள் சூழ்ந்த சிந்தனைப் போக்குகளின் ஆக்கிரமிப்புக்கு வழிவகுக்கப் போகின்றது என்பதை தெளிவாக உணர முடிகிறது.

குறிப்பிடத்தக்க சில புறநடைகள் இருந்த போதிலும், இலங்கை அரசியலில் பிக்குமாரின் பாத்திரம் அநேகமாக எதிர் மறையானதாகவே இருந்து வந்திருக்கிறது. கௌதம புத்தரின் சிந்தனைகளையே அவமதிக்கின்ற வகையிலான 'சிங்கள பௌத்தம்" என்ற கருத்தாக்கம் இதற்கு ஒரு பிரகாசமான உதாரணம். மஞ்சள் அங்கி அணிந்த ஒரு பிக்கு சிங்கள மக்களால் பெரிதும் ஆதரிக்கப்பட்ட ஒரு பிரதமரைச் சுட்டுக் கொன்றதும் இன்னொரு பிக்கு இக் கொலையில் குற்றஞ் சாட்டப்பட்டு சிறைத் தண்டனை பெற்றதும் தற்செயலானவையல்ல. சிங்களவர் மத்தியில் நிலவும் சிந்தனைக் குழப்பம், செயல் குழப்பம் ஆகியவற்றுக்கு சிங்கள, பௌத்த மத சிந்தனையில் ஒழுக்க நியாய பாரம்பரியம் ஒன்று இல்லை என்பதற்கான சரித்திர நினைவுச் சின்னம் போன்ற சான்றே இச்சம்பவங்கள்.

இலங்கையின் மாபெரும் வரலாற்றுப் பதிவேடாகக் கருதப்படும் மஹாவம்சம், மகாநாம என்ற மதகுருவால் கி.பி. 6 ஆம் நூற்றாண்டில் எழுதப்பட்டது. மஹாவம்ச நூலின் பிரதிகள் அனைத்தையும் தீயில் பொசுக்க வேண்டும். ஏனென்றால், சிங்கள பௌத்தர்களின் இன ரீதியான சிந்தனைக்கு அவைதான் பெரிதும் பொறுப்பாயிருக்கின்றன என்று மதிப்புக்குரிய ஒரு சிங்களக் கல்விமான் கலாநிதி ஈ.டபிள்யூ. அதிகாரம் தெரிவித்திருந்ததை இங்கு நினைவுபடுத்துவது பொருத்தமானதாக இருக்கும்.

'கௌதம புத்தர் அரசியல், போர் மற்றும் சமாதானம் ஆகியவை குறித்து மிகவும் தெளிவாகவே போதித்திருக்கிறார். பௌத்த மதம் அதன் போதனைகளில் அகிம்சையையும் சமாதானத்தையும் மக்களுக்கான செய்தியாக வலியுறுத்துகிறது; எந்த வகையான வன்முறையையோ அல்லது உயிர்ச் சேதத்தையோ அது ஒரு போதும் அங்கீகரிக்கவில்லை. பௌத்த சிந்தனைகளின் படி நீதியான போர் என்று கூட ஒன்று இல்லை" என்று 'புத்தர் போதித்தது என்ன?" என்ற தேரவாத பௌத்தம் குறித்த பிரபல பாடநூலை எழுதிய பேராசிரியர் வல்பொல ராகுல தேரோ கூறியிருக்கிறார்.

ஆனால், இன்று இலங்கையில் அநேகமான பௌத்த பிக்குமார் இந்தப் போதனைக்கு முற்றிலும் மாறாக அல்லவா செயற்படுகிறார்கள். அவர்கள் தமிழ் மக்களுக்கு எதிரான போரை நியாயப்படுத்துவதுடன் மஞ்சள் அங்கிகளை களைந்துவிட்டு துப்பாக்கியைக் கையில் ஏந்திப் போர் முனைக்குச் செல்லவும் தயார் என்று பகிரங்கமாக மேடைகளில் முழங்குகிறார்கள். சிறுபான்மையினத்தவர்களின் நியாயபபூர்வமான எந்தவொரு அரசியல் அபிலாசைகளையையும் ஏற்றுக்கொள்ள இவர்கள் மறுக்கிறார்கள்.

அண்மைக் கால சமாதான முயற்சிகளுக்கு எதிரான பிரசார இயக்கங்களில் பிக்குமார் முன்னணியில் நின்று செயற்படுகிறார்கள். சிறுபான்மை இனத்தவர்கள், மதத்தவர்களுக்கு எதிரான பிரசாரங்களை நிகழ்ச்சித் திட்டங்களாகக் கொண்டே அவர்கள் நேரடி அரசியலிலும் இறங்கியிருக்கிறார்கள்.

அமைதி, சமாதானத்துக்கு எதிராக செயற்படுகின்ற அரசியல்வாதிகளை சரியான வழியில் நெறிப்படுத்த வேண்டிய தார்மீகப் பொறுப்பைக் கொண்ட பிக்குமார் அந்த அரசியல் வாதிகளை விடவும் தீவிரமாக அமைதிக்கு எதிராகச் செயற்படுகிறார்கள். சமாதானத்தின் பெறுமதியை சமுதாயம் விளங்கிக் கொள்வதற்கு பெரும் தடையாக இந்த பிக்குமார் இலங்கையில் விளங்குவதை அடிப்படையாகக் கொண்டே இன்றைய துரதிர்ஸ்டவசமான நிலைவரங்களின் பின்னணிகளை நோக்க வேண்டும்.

பௌத்த மதத் தீவிரவாதம் அரசியலை வழிநடத்துமானால், அரசியல் அதிகாரத்தைக் கைப்பற்றுவதற்கு அல்லது கைப்பற்றிய அரசியல் அதிகாரத்தைத் தொடர்ந்து நிலை நிறுத்துவதற்கு அரசியல்வாதிகள் அந்தத் தீவிரவாதத்துக்கு இசைவான அனுகுமுறைகளைக் கடைப்பிடிப்பார்களேயானால், இலங்கை அதற்குரித்தான அமைதி மற்றும் பொருளாதார மேம்பாடு சகலவற்றையும் பரிதாபகரமாகப் பறிகொடுத்துஉலகில் தோல்வி கண்ட சமுதாயமாக அந்தகாரத்தில் மூழ்கப் போகிறது.

நீங்களும் ரசிக்கலாம் கோடையின் வனப்பை.

குளிர் தேசத்தில் வாழும் எமக்கு கோடை காலத்தின் அருமை
ந்ன்றாகவே தெரியும்.
கடும் குளிர் காலம் எப்படி இருக்கும் என்பது அனுபவித்தவர்களுக்கு தெரியும். கடும் குளிர் காலத்தில் இருக்கும் எமக்கு ஆறுதலாக இருப்பது இவை போன்ற கோடையில் எடுத்த படங்கள் தான்.