விஜயகாந்தின் அரசியல் இணையத்தளம்!

நடிகர் அரசியலாளர் விஜயகாந் அவர்களுக்காக புதிய ஒரு இணையத்தளம்
ஆரம்பிக்கப்பட்டிருக்கிறது.இதில அவர் தொடர்பான விடயங்கள்,அவரின்
பேட்டிகள்,அவரின் புகைப்படங்கள்,அவரின் பேச்சுக்கள்,அவர் ரசிகர்களுக்கு எழுதும் கடிதங்கள் போன்ற பல விடயங்கள்அவற்றில் தொகுக்கப்பட்டிருக்கிறது.அவரின் அரசியல் பயணத்துக்கு முன்னோடியாக
அவரைப் பற்றிய சகல விடயங்களையும் தாங்கி இந்த இணையத்தளம்
ஆரம்பிக்கப்பட்டிருக்கிறது. தமிழ் எழுத்துருவினை தரவிறக்கம் செய்வதன்
மூலம் இத்தளத்தினை தமிழில் பார்க்கலாம்.

தளம் இதுதான்:--http://www.namadhuvijayakanth.com

உண்மை உண்மையைத் தவிர வேறொன்றில்லை

இன்று ஒரு பதிவு இட்டிருந்தேன் தமிழ் பேசும் முஸ்லீம்கள்...என்ற தலைப்பிலே எழுதியிருந்த ஒரு பதிவு பலர் தங்கள் கருத்துக்களை தெரிவித்திருந்தனர்.அதில் பெயரிலி மற்றும் டீ.சே அவர்கள் "உண்மை"பற்றி சில உண்மைக்கருத்துக்களை உண்மையாகவே கூறியிருந்தனர்.பெயரிலியின் பின்னூட்டம் இடும் வேகம் ,விவேகம் ஆச்சரியத்தினை அளிக்கிறது.
நீண்டநாட்களின் பின்னர் பின்னூட்டகுளத்தில் தொபுக்கடீர் எண்டு மூழ்கி கரை ஏறியது மிகவும் சந்தோஷத்தினை தந்தது.

இது டீ.சே யின் பின்னூட்டத்தின் ஒரு பகுதி:-'உண்மைகளை மட்டுமே பேசுதலே' மிகச்சரியானது என்ற ஒரு முடிவுக்கு வந்திருந்தேன்.

இதற்குபெயரிலியின் பின்னூட்டம்:-
'///உண்மைகளை மட்டுமே பேசுதலே' மிகச்சரியானது என்ற ஒரு முடிவுக்கு வந்திருந்தேன்.///ப்ரோ ரப்பர், 'உண்மை என்றும் ஒன்றானதல்ல";அதனால், "நிகழ்வுகளைப் பேசுவோம்; அதுவும் கிடைத்த தரவுகளாற் பேசுவோம்; எமது பார்வைகளால் அல்ல" ;-))

இதற்கு டீ.சே யின் பதில் பின்னூட்டம்:-
ப்ரோ தெளிவுபடுத்தியமைக்கு நன்றி. //ஆதாரத்துடன் பேசப்படும் உண்மையான விடயங்களை // என்று முதல் பின்னூட்டத்தில் கூறப்பட்ட உண்மைகளைத்தான் நானும் குறிப்பிட விரும்பினேன் :-). அவரவர்க்குரிய 'உண்மைகளை' அல்ல. பிறகு பின்நவீனத்துவக்காரர்களும் அடிக்க வந்துவிடுவார்கள். உண்மை என்பது எப்படி ஒன்றாக இருக்கும். பல உண்மைகள்தானே உண்மை என்ற உண்மை உனக்குத்தெரியாத உண்மையற்றவனாய் இருக்கின்றாயே என்று (ஆகா ஒருவருக்கும் விளங்காத ஒரு சொற்றொடரை நானும் எழுதிவிட்டேன் :-))

உண்மையாகவே எனக்கு இவர்கள் உண்மையைப்பற்றி எழுதியிருக்கும் உண்மைக்கருத்துக்கள் புரியவில்லை.பெயரிலி சொன்ன உண்மையைப் பற்றிய உண்மைக் கருத்துக்கள் எனக்கு கொஞ்சம் விளங்குகிறது.ஏன் இப்படி உண்மையினைப் பற்றி உண்மையில் இவர்கள் எழுதிய உண்மைக்கருத்தினை புரிந்துகொள்ள உண்மையாகவே சிரமமாக இருக்கிறது என்று யோசித்தபோது இந்த கதை ஞாபகம் வந்தது.

எங்கோ எப்போதோ படித்தது.நீதிபதிகள் இருக்கிறார்களே இவர்களுக்கு உண்மையினை அறிந்து கொள்ளவேண்டிய தேவை, கட்டாயம் உண்டு.அவர்கள் எப்படி உண்மையினை அறிந்து கொள்கிறார்கள் என்பதற்கு உதாரணம்இந்த சம்பவம் என்று வைத்துக் கொள்ளுங்கள்.

ஒரு வக்கீல் முதன்முறையாக நீதிமன்றம் வருகின்றார் முதல் அனுபவம் வேறு.எனவே உணர்ச்சி வசப்படுகிறார்.கூச்சப்படுகிறார்.தடுமாறுகிறார்.

"தூரதிர்ஸ்டம் பிடித்த என் கட்சிக்காரர் விதிவசத்தால் அகப்பட்டுக் கொண்ட என் கட்சிக்காரர்...!இதற்கு மேல் பேசமுடியாமல் தடுமாறுகிறார்.இப்போது நீதிபதி சொல்கிறார்.

"உங்களிடம் வந்துவிட்ட உங்கள் கட்சிக்காரரின் நிலை எங்களுக்கு தெளிவாக புரிந்துவிட்டது...மேலே தொடர்ந்து வழக்கு விபரங்களை சொல்லுங்கள்!"

சத்தம் தமிழனுக்கு ரொம்பப் பிடித்தது!

கடந்த வார இறுதியில் இங்கு நடந்த இரண்டு நிகழ்வுகளுக்கு போகவேண்டி ஏற்பட்டது.இரண்டுமே தமிழர்களின் விழாக்கள் முற்றுமுழுதாக தமிழர்களே கலந்து கொண்டனர்.முதல் விழாகாலை 10.00 மணிக்கு என்று சொல்லியிருந்தனர்.சரி என்று நானும் துணைவியாருமாக புறப்பட்டு போனால் விரைவு நெடுஞ்சாலையில்அந்த விழாவுக்கு செல்லவேண்டிய வெளியேற்றத்தினை(exit) தவறவிட்டுவிட்டேன்.

சரி என்று போட்டு வேறு வெளியேற்றம்? வாயிலாக வெளியே வந்து விழா மண்டபத்தினை சென்றடைந்தபோது நேரமோ 10.30 மணியாச்சு விழா தொடங்குவதற்கான அறிகுறியே காணவில்லை.ஒவ்வொருவராக வரத்தொடங்கி விழா ஆரம்பித்தது காலை 11.30 மணிக்கு.விழா ஆரம்பித்து சில நிமிடங்களிலேயே தொல்லை தரத் தொடங்கிவிட்டதுஒலிபெருக்கி.200பேர் கூடியிருக்கும் ஒரு சிறிய மண்டபத்தில் இவ்வளவு சவுண்டில் ஒலிபெருக்கியை வைத்தால் எப்படி இருக்கும்.இரண்டுதடவை ஒலிபெருக்கி இயக்கிக் கொண்டிருந்தவரிடம் சொன்னேன் ஒலியளவு அதிகமாக இருக்குதுகொஞ்சம் குறையுங்கோ எண்டு.அவரும் சிறிது குறைப்பார் பின்னர்சில நிமிடங்களின் பின்னர் ஒலியளவு பழையபடி வந்துவிடும்.இப்படி அன்றையவிழா தொல்லையாக கழிந்தது.

இங்கு பல தமிழர்களின் விழாக்களுக்கு போயிருக்கிறேன்.அங்கு தொல்லைதருவது இந்த ஒலிபெருக்கியாகவே இருக்கும்.தமிழர்களின் விழாக்கள் என்றால்அலறிக் கொண்டிருக்கும் ஒலிபெருக்கி.மற்றைய நாட்டவர்களின் நிகழ்வுகளில்பார்த்தால் நிகழ்வின் தேவையொட்டியே இருக்கும் ஒலிபெருக்கின் ஒலி அளவு.ஏன் இப்படி வதைக்கிறார்களோ தெரியவில்லை.ஒலியளவு தேவையான நிகழ்வுகள் என்றால் பரவாயில்லை.எல்லா நிகழ்வுகளுக்கும்அல்லவா அப்படி செய்கின்றனர்.

தமிழர்களுடன் பிறப்பில் தொடங்கும்"சத்தம்" அவர்களின் வாழ்வெங்கினும் தொடர்கிறது.பிறந்தால் "சத்தம்" பெரியவள் ஆனா"சத்தம்" திருமணத்தில் "சத்தம்"இறந்தால"சத்தம்" நல்ல காலம் முதலிரவை மட்டும் விட்டு வைத்திருக்கிறார்கள்.இனி கோயிலில் போனால் "சத்தம்".அது இறைவனை கூட சத்தமிட்டுதுயில் எழுப்பி வணங்க சொல்கிறது. இது சமயம்.இப்படி தமிழனுக்கு சப்தம் இடுவது,சத்தம் கேட்பதும் பிடித்துப் போயிறு போலும்.

நல்ல காலம் பனையின் உச்சியில் லவுட்ஸீக்கர் கட்டி பாட்டு போட்ட பரம்பரையில் வந்த எம் தமிழர் இங்கும் அதையே செய்திருப்பர்.நல்ல காலம் இங்கு பனைகள் இல்லாமல் போனது.அத்துடன் அங்கு மாதிரி இல்லாமல் இங்குள்ள சட்டங்கள்.அந்த மட்டில் எமது காதுகள் தப்பித்ன போங்கள்.

முகமூடிகள் கிழிகின்றன...மூக்குகள் அறுக்கப்படுகின்றன...

புலிகள் தமிழ்நாட்டிலிருந்து போதைப் பொருட்களை கடத்தி தமது இயக்கத்துக்கு நிதி திரட்டுகிறார்கள்.என இன்று நேற்றல்ல பல காலமாகவே இலங்கை மற்றும் இந்திய ஊடகங்கள் சில புலிகள் மேல் புழுதிவாரி தூற்றிவந்தன, வருகின்றன. இலங்கையை சேர்ந்தவர்கள் யாராவது போதை பொருள் கடத்தி பிடிபட்டாலும் அவர்கள் இந்த ஊடகங்களுக்கு மட்டும் புலியாக தெரிவார்கள்.செய்தி வெளியிடுவார்கள்.

இங்கு அவர்களின் நோக்கம் புலிகளை இழிவுபடுத்துவது மட்டுமே.இவர்களுக்கு எப்படியாவது என்ன வழியிலாவது புலிகளை தூற்றவேண்டும்.சென்னையில் சிறுமிகளை பாலியல் வன்புணர்வு செய்ததாக கைதுசெய்யப்பட்ட ஒரு சுங்க அதிகாரியின் விடயத்தில் கூட அவரின் வீட்டில் புலிகள் பற்றிய புத்தகங்கள் கிடந்தன என்பதை சம்பந்தபடுத்தி புலிகளுக்கு சார்பானவர்கள் என்றால் அவர்கள் சிறுமிகளை வன் புணர்பவர்கள் என்றோ அல்லது புலிகள் என்றால் இப்படியான சம்பவங்களை செய்பவர்கள் என்றோ ஒரு தோற்றப்பாட்டை பாமர மக்கள் மத்தியில் ஏற்படுத்தவே இவ் ஊடகங்கள் முயல்கின்றன.மொத்தத்தில் புலியெதிர்ப்பு என்னும் தமது அரிப்பை தாமே இப்படி செய்தி வெளியிடுவதன் மூலம் தடவிவிட்டுக் கொள்கின்றன.

இதற்கு எவ்வையிலும் குறைந்ததல்ல இந்தப்பதிவு 40தடவைகள் சிறுமியை பாலியல் துஷ்பிரயோகம் யாழ்ப்பாண புலி என்னும் இத்தலையங்கத்தின் மூலம் இதனை எழுதியவரின் முகமூடி கிழிந்துவிட்டது.இங்கு இவர் பேசியது பாலியல் துஸ்பிரயோகம் பற்றியல்ல.இவரின் நோக்கமும் பாதிக்கப்பட்ட சிறுமி பற்றியல்ல. புலியெதிர்ப்பே இங்கு முன்னிலை வகிக்கிறது. மனநலம் பற்றி கதைக்கும் இவரின் மனநலம் பற்றி மற்றவர்கள் சந்தேகப்படும் படி இருக்கிறது.கண்டிப்பாக இச் செயலை செய்தவருக்கு கடுமையான தண்டனை வழங்கப்படவேண்டும் என்பதில் மாற்றுக் கருத்துக்கே இடமில்லை.

இவரின் பதிவுகளில் பொதுநலம் என்பர்.மக்கள் என்பர்,ஜனநாயகம் என்பர்,பொருள்முதல் வாதம் என்பர்.மர்க்சிசம் என்பர்,சோசலிசம்என்பர்,இலக்கியம் என்பர்,இலக்கணம் என்பர்.போரெதிர்ப்பு என்பர் அழகாக வார்த்தையாடுவார்..இவை யாவும் முகமூடிகள். நிஜமுகம் புலியெதிர்பு.நிஜமுகத்தினை மறைப்பதற்காக இந்தமுகமூடிகள்.இந்தபதிவுடன் கிழிந்தன முகமூடிகள்,நிற்பது அவரின் நிஜமுகம் அல்லது அவரின் மனம்.வேண்டாம அய்யா முகமூடிகள்.நீங்கள் எதை எழுத விரும்புகிறீர்களோ அதை பாசாங்கு இல்லாமல் எழுதுங்கள் நீங்கள் எதை எழுதினாலும் பார்க்க படிக்க பலர் இருக்கின்றனர்.ஏன் நான்கூட படிப்பேன்.ஏனெனில் பதிவுகள் படைப்பது யாராக இருந்தாலும் தீர்மானிப்பது நான்தானே.
யாரும் எதையும் எழுதலாம்.அது அவரவர் சுதந்திரம் நான் வேண்டுவது
எல்லாம் பாசாங்கு இல்லாத எழுத்துக்கள்.

இதைப் போலதான் இன்னுமொருவிடயத்தில் சில இலங்கை இந்திய ஊடகங்களின் மூக்கறுக்கப்பட்டிருக்கிறது.முதலாவது பந்தியை படியங்கள்.இனி விடயத்தினை சொல்கிறேன்.

தமிழ்நாட்டிலிருந்து சிறிலங்காவிற்கு கடத்தப்படுகிற போதைப் பொருள்களுக்கும் தமிழீழ விடுதலைப் புலிகளுக்கும்எதுவித தொடர்பும் இல்லை என்று இந்திய அரசின் போதைப் பொருள் தடுப்புத்துறையின் மண்டல இயக்குநர்சங்கர் ஜிவால் அறிவித்துள்ளார்.

இது தொடர்பாக சென்னையிலிருந்து வெளியாகும் "டெக்கான் குரோனிக்கல்" ஆங்கில நாளேட்டுக்கு அவர் அளித்த நேர்காணல்:

தமிழ்நாட்டிலிருந்து சிறிலங்காவிற்கு தமிழீழ விடுதலைப் புலிகள் போதைப் பொருள்களை கடத்தியதற்கான எதுவித சான்றும் இதுவரை இல்லை. தமிழீழ விடுதலைப் புலிகள் போதைப் பொருள் கடத்தலில் ஈடுபடுவதாக பலர் சொல்லிக் கொண்டு இருக்கிறார்கள். ஆனால் அதை நிரூபிக்கும் ஆவணங்கள் எதையும் அவர்கள் பெற்றிருக்கவில்லை. புலனாய்வுத்துறை தரப்பு தகவலும் கூட இது தொடர்பில் இல்லை என்றார்.அந்த நாளேட்டில் இடம்பெற்றுள்ள மேலும் சில தகவல்கள்:

கடந்த ஜனவரி முதல் ஓகஸ்ட் மாதம் வரை போதைப் பொருள் கடத்தியதாக தமிழ்நாட்டில் 54 பேர் கைது செய்யப்பட்டுள்ளனர். 19 பேர் சிறிலங்காவைச் சேர்ந்தவர்கள். மற்ற அனைவரும் இந்தியர்கள்.

இந்த ஆண்டு காலத்தில் 72 கிலோ கிராம் போதைப் பொருள் கடத்தப்பட்டுள்ளது. இதில் 275 கிராம் மட்டும்தான்
மாலத்தீவிற்கு கடத்தப்பட இருந்தது. மற்ற அனைத்தும் சிறிலங்காவுக்குத்தான் கொண்டு செல்ல திட்டமிடப்பட்டிருந்தது.போதைப் பொருள் கடத்தலில் சிறிலங்கா கேந்திரமாக விளங்குகிறது.
இதுவரை நிலப்பரப்பில்தான் போதைப் பொருள்கள் பறிமுதல் செய்யப்பட்டது. அண்மையில் படகு மூலம் சிறிலங்காவுக்கு கடத்தப்பட இருந்த போதைப் பொருளை இந்திய கடற்படை உதவியுடன் முதன் முறையாக இந்தியபோதைப் பொருள் பறிமுதல் செய்துள்ளனர்.

இப்போது சொல்லுங்கள் சில ஊடகங்களின் மூ........க்கு அறுக்கப்பட்டிருக்கிறதுதானே.

தமிழ் பேசும் முஸ்லிம்களும் தங்கத் தலைவன் பின்னால்.....

தமிழ் பேசும் முஸ்லிம்களும் தங்கத் தலைவன் பின்னால் அணி திரள வேண்டும்: மௌலவி எஸ்.எம்.சகீல் வேண்டுகோள்

வவுனியா பிரகனடத்தை நிறைவேற்ற தமிழ்பேசும் முஸ்லிம்களும் தங்கத் தலைவன் பிரபாகரன் பின்னால் அணி திரள வேண்டும் என்று யாழ்ப்பாண இஸ்லாமிய மக்கள் பணிமனை செயலர் மௌலவி எஸ்.எம்.சகீல் வேண்டுகோள் விடுத்தார்.

கிளிநொச்சியில் நேற்று வியாழக்கிழமை நடைபெற்ற தமிழ்த் தேசிய எழுச்சி நிகழ்வில் அவர் ஆற்றிய உரை:

ஆண்டாண்டு காலமாக ஆண்டுவந்த பூமியையும் வீதிகளையெல்லாம் சிங்கள ஆக்கிரமிப்பாளர்கள் சுற்றிவளைத்தனர்.
சிங்கள அரசுகள் தமிழ்பேசும் மக்களுக்கு எதிராக செயற்பட்டன. எங்களுடைய உரிமைகளை நாங்கள் பெற்று வாழ்வதற்குக் கூட தடை விதித்தனர்.
அந்த நிலைமையில் தான் இந்தப் போராட்டம் உருவாக்கப்பெற்றது.
இந்தப் போராட்டத்திலும் முஸ்லிம்கள் என்றும் சளைத்தவர்கள் அல்லர். தமிழர்களும் முஸ்லிம் மக்களும் ஒன்றிணைந்தவர்களாகவே இந்தப் போராட்டத்தை முன்னெடுத்துச் சென்ற வரலாறுகளையும் நாங்கள் பார்க்கின்றோம்.

எங்களுடைய தாயக கடமை என்று புறப்பட்ட இந்தப் போராட்ட பயணத்திலே நாம் தமிழ்பேசும் மக்கள் என்ற வகையில் கைகோர்த்தவர்களாக என்றும் செயற்படவேண்டும்.
தலைவர் பிரபாகரன் பின்னணியிலே தங்களுடைய வரலாற்றை தமிழர்கள் முன்னெடுத்துச் செல்லுகின்றார்கள். இது பாராட்டப்படக்கூடிய விடயம்.
நாம் நியாயத்தைப் பேசுகின்றோம். உண்மையை இந்த உலகிற்கு, இந்த மண்ணுக்கு, சர்வதேசத்திற்கு நாங்கள் புலப்படுத்துகின்றோம்.

ஆனால் நாங்கள் ஓர் குடும்ப உறவைக் கொண்டவர்கள். தமிழ்மக்கள், முஸ்லிம் சமூகங்களும் ஒரு குடும்ப உறவைக் கொண்டவர்கள். எங்களுக்குள் பல பிரச்சனைகள் எழலாம். அதனை நாங்களே தீர்ப்போம்.
எங்களுடைய குடும்பமே பேசித்தீர்த்துக்கொள்ள முடியும். இதற்குள் அன்னியவர்களின் ஊருடுவல் எங்களுக்குத் தேவையில்லை.

வவுனியா எழுச்சி நிகழ்வில் எடுத்த முடிவுகளை நிறைவேற்ற தங்கத்தலைவன் பின்னால் அணிசேர தமிழர்கள் மற்றுமல்ல தமிழ்பேசும் மக்கள் அனைவரும் தயாராக இருக்கிறார்கள் என்றார் அவர்.

..புதினம்..

கதிர்காமர் கொலையின் பின்னரான நிலைவரங்கள்

கதிர்காமர் கொலையின் பின்னரான அரசியல் கள நிலைவரங்கள்
ஸ்ரீலங்காவின் வெளிநாட்டமைச்சர் லக்ஷ்மன் கதிர்காமர் கொல்லப்பட்டு மரணச் சடங்கும் ஒருவாறு முடிந்து விட்டது. தமிழ் கிறிஸ்தவ அடையாளத்துடன் பிறந்து, ஆங்கிலக் கிறிஸ்தவ அடையாளத்துடன் வளர்ந்து, சிங்கள பௌத்த அடையாளத்துடன் அவர் மறைந்திருக்கின்றார். சர்வதேச அளவில் வீழ்ச்சி அடைந்திருந்த சிங்கள தேசத்தின் கௌரவத்தை மீட்டெடுத்து நிலைநாட்டியவர் என்ற வகையில் சிங்கள தேசம் அதற்கான நன்றிக் கடனை மரணச் சடங்கினை சிங்கள தேசச் சடங்காக கொண்டாடியதன் மூலம் நிறைவாகவே செய்து முடித்திருக்கின்றது.

அத்துடன், சிங்கள தேசத்தினால் ஒரு தமிழர் கௌரவிக்கப்பட வேண்டுமாயின் அவர் ஒரு சிங்கள பௌத்தராக மாறுதல் வேண்டும் என்ற செய்தியையும் அடையாளம் காட்டியிருக்கின்றது.

இவற்றினை விட இவரது மரணம் சிங்கள தேசத்திற்கு `பிண அரசியல்' ஒன்றினை நடாத்தும் வாய்ப்பினையும் பெற்றுக் கொடுத்திருக்கின்றது. வாய்ப்புகள் பறிக்கப்பட்டவர்கள் மீண்டும் களத்திற்கு வந்து சேர்ந்துள்ளனர். பொதுக்கட்டமைப்பின் பிறப்புடன் நிர்ப்பந்தமாக விலக்கப்பட்ட பேரினவாத நிகழ்ச்சி நிரல் மீண்டும் மைய அரசியலில் மேலாதிக்கத்தை பெற்றிருக்கின்றது.

ஜனாதிபதித் தேர்தலுக்காக பேரினவாதத்துடன் கூட்டுச் சேர்வதற்கு விரும்பியும் தடைகளைக் கண்டிருந்த பிரதமர் மஹிந்த ராஜபக்ஷவிற்கு தடைகளை எதிர்ப்பின்றித் தாண்டும் சந்தர்ப்பமும் கிடைத்திருக்கின்றது.
பேரினவாத நிகழ்ச்சி நிரலில் இருந்து நிர்ப்பந்தம் காரணமாக வெளியே வந்த ஜனாதிபதி சந்திரிகா மீண்டும் பேரினவாதத்தின் கைதியாக நிகழ்ச்சி நிரலுக்குள் நுழைந்திருக்கின்றார்.

மரணம் நிகழ்ந்த ஆரம்பத்தில் பிரதமரோ, ஜனாதிபதியோ பேரினவாத நிகழ்ச்சி நிரலுக்குள் செல்லத் துணியவில்லை. யுத்த நிறுத்தம் குழம்பிவிடுமோ என்ற அச்சம் தான் அதற்குக் காரணம். ஜனாதிபதி வெளியிட்ட முதலாவது அறிக்கையில் புலிகளின் பெயரைக் கூறாமல்தான் கொலைக்கான கண்டனத்தை தெரிவித்திருந்தார். பிரதமர் மஹிந்த ராஜபக்ஷ கூட பொலிஸாரின் அறிக்கை புலிகளைக் குற்றம் சாட்டுவதாக மட்டும் கூறியிருந்தார்.

ஜே.வி.பி. மரணச் சடங்கு நிகழ்ச்சிக்குள் நுழைந்த பின்னர் தான் எல்லாமே தலை கீழாக மாறின. ஜே.வி.பி. இம்மரணத்தை புலிகளுக்கு எதிரான அரசியலுக்கு பயன்படுத்த முன் வந்தது. அதற்கான நிகழ்ச்சி நிரலும் போடப்பட்டது. அடுத்தடுத்து நான்கு காரியங்கள் அரங்கேற்றப்பட்டன. முதல் கட்டத்திற்கு அனைத்து கட்சிகளையும் இணைத்த மாநாடு கூட்டப்பட்டது.
அம்மாநாட்டில் புலிகளே இக்கொலையைச் செய்தார்கள் என பகிரங்கப்படுத்தும்படி பிரதமர் மஹிந்த ராஜபக்ஷ நிர்ப்பந்திக்கப்பட்டார். சர்வதேச பயங்கரவாத நிகழ்ச்சி நிரலின் அடிப்படையில் இக்கொலையினைப் பார்க்க வேண்டும் என சர்வதேச சமூகத்திடம் கோரிக்கை விடப்பட்டது. அதேவேளை, புலிகளைப் பெயர் குறித்து கண்டிக்காதது தொடர்பாக ஜனாதிபதி மீதும் குற்றம் சாட்டப்பட்டது. உடனடியாக ஜனாதிபதி இது தொடர்பாக நாட்டு மக்களுக்கு விளக்கம் கொடுக்க வேண்டும் என்றும் கேட்கப்பட்டது.

இதன் பின்னர் தான் ஜனாதிபதி உண்மை நிலையினை தரிசிக்கத் தொடங்கினார். சிங்கள தேசத்திடம் இருந்து தன்னை அந்நியப்படுத்தும் வேலைத் திட்டம் ஒன்று அரங்கேறுவதை அடையாளம் கண்டார். இதிலிருந்து தப்புவது என்றால் தானும் பேரினவாத நிகழ்ச்சி நிரலுக்குள் நுழைவதைத் தவிர வேறு வழியில்லை என்பதை உணர்ந்து கொண்டு, பொதுக் கட்டமைப்பு நிர்ப்பந்தம் காரணமாக தான் கழற்றி எறிந்த பேரினவாத கவசத்தை மீண்டும் எடுத்து போர்த்துக் கொண்டார். இந்தப் போர்ப்புடன் இரண்டாவது கட்டம் அரங்கேறத் தொடங்கியது.

இரண்டாவது கட்டத்தில் ஜனாதிபதி நாட்டுமக்களுக்காக தொலைக்காட்சியில் தோன்றி உரையாற்றினார். புலிகளை எவ்வளவு தூரம் வெழுத்து வாங்க முடியுமோ அவ்வளவிற்கு வெழுத்து வாங்கினார். புலிகள் தான் இந்தக் கொலையைச் செய்தார்கள் என உறுதிபடக் கூறினார். அதன் மூலம் பேரினவாத அரசியலை நடாத்த ஜே.வி.பி.க்கு மட்டும் தெரியும் என நினைக்கக்கூடாது. தனக்கு அவர்களை விட நிறையத் தெரியும் என்பதை ஜே.வி.பி. யின் காதுகளில் உறைக்கக் கூறினார். அவரது செயற்பாடு எனக்கு பிரேமதாஸா காலத்தை நினைவுபடுத்தியது. அக்காலத்தில் ஜே.வி.பி.யினை விட இந்திய எதிர்ப்பினை உரக்கக் கூறி ஜே.வி.பி. யை திக்குமுக்காடச் செய்தார் பிரேமதாஸா. இந்த புலி எதிர்ப்பு உரைக்கு மத்தியிலும் மறைமுகமாக ஜே.வி.பி.யினைத் தாக்குவதையும் ஜனாதிபதி கைவிடவில்லை.

மூன்றாவது கட்டம், மரணச் சடங்கில் அரங்கேற்றப்பட்டது. அங்கு வழமையான மரபிற்கு மாறாக, அரசாங்கத்தின் சார்பில் பிரதமர் உரையாற்றினார். கொலைக்கு புலிகளை குற்றம் சாட்டியதுடன் பயங்கரவாதத்திற்கு எதிராக போராடுவதற்கு தங்களோடு கைகோர்த்து வரும்படி சர்வதேச சமூகத்தையும் கேட்டுக்கொண்டார். அவ்வுரை ஜே.வி.பி. எழுதிக் கொடுக்க பிரதமர் வாசிப்பது போல இருந்தது. உரைமுழுவதும் ஜே.வி.பி.யின் நாற்றம் அடித்தது. இவ்வளவு காலமும் பிரதமர் பேரினவாதத்தின் பக்கம் இருந்தாலும் வெளித்தோற்றத்தில் ஒரு நடுநிலையானவராகவே காட்சியளித்தார். இந்த உரையோடு அவரது வெளித்தோற்றம் கழன்றுவிட உண்மைத் தோற்றம் வெளியில் வர ஆரம்பித்தது. எல்லாவற்றுக்கும் ஜே.வி.பி. தம்பிமார் தம்மோடு நிற்கின்றனர் என்ற குஷிதான் காரணம். கதிர்காமரின் கொலை தனக்கு அதிர்ஷ்டத்தை தந்ததாக நினைத்து புளகாங்கிதமடைந்து காற்றில் பறந்தார். பிரதமர் பதவிக்காக கதிர்காமர் வில்லனாக நின்றதையும், ஜே.வி.பி. தம்பிமார் அவருக்கு பக்கபலமாக நின்றதையும், அவர்களை வெல்வதற்கு பௌத்த பரிவாரங்களை தான் திரட்ட நேர்ந்ததையும் ஒரு கணம் மறந்தார்.

நான்காவது கட்டத்தில், மரண நிகழ்விற்கு வந்த வெளிநாட்டுப் பிரமுகர்கள், மரணச் சடங்கிற்கு வராமல் தூதுவராலயங்களில் முடங்கிக் கிடந்த இராஜதந்திரிகள் எல்லோரும் அழைக்கப்பட்டனர். அவர்களுக்கு பயங்கரவாதம் பற்றிய பெரிய வகுப்பொன்று எடுக்கப்பட்டது. கௌசல்யன் படுகொலை, சிவராம் படுகொலையெல்லாம் பயங்கரவாதமல்ல என விளக்கப்பட்டு கதிர்காமரின் கொலையே மாபெரும் பயங்கரவாதம் என எடுத்துரைக்கப்பட்டது. இராஜதந்திரிகள் எல்லாம் தங்கள் தங்கள் நாடுகளுக்குச் சென்று புலிகளுக்கு எதிரான நடவடிக்கைகளை துரிதமாக முன்னெடுங்கள் என வேண்டுகோள் விடுக்கப்பட்டது.

இவ்வாறு நான்கு வகையான அரங்கேற்றங்கள் எல்லாம் சர்வதேச சக்திகளுக்காக செய்தும் அவை ஒன்றும் அவர்களின் காதில் விழவில்லை. அமெரிக்க ஜனாதிபதி புஷ் தொடக்கம் ஐ.நா. பொதுச் செயலாளர் கொபி அனான் வரை கூறிய வார்த்தை ஒன்றே ஒன்றுதான்.

"கதிர்காமரின் கொலையைப் படிப்பினையாகக் கொண்டு யுத்த நிறுத்தத்தை வலுப்படுத்துங்கள். சமாதானத்தை முன்னெடுங்கள்"

அவர்களைப் பொறுத்தவரை கதிர்காமரின் கொலையை ஒரு தனி நிகழ்வாகப் பார்க்கவில்லை. மாறாக, தொடர் நிகழ்வின் விளைவாகத்தான் பார்த்தனர். அண்மைக் காலமாக அரங்கேறும் தொடர் நிகழ்வு தொடர்ந்தால் இவ்வாறான விளைவுகள் தான் ஏற்படும் என்பது அவர்களது கருத்தாக இருந்தது. எனவே, விளைவுக்கு வைத்தியம் செய்வதனை விடுத்து, தொடர் நிகழ்வுக்கு வைத்தியம் செய்வதிலேயே அவர்கள் கவனமாக இருந்தனர்.

அந்தத் தொடர் நிகழ்வு என்பது இரு தரப்பினரிடையேயும் நடந்து கொண்டிருக்கும் நிழல் யுத்தம் தான். நிழல் யுத்தங்கள் தொடர்ந்தால் சாதாரணமான மனிதர்கள் மட்டுமல்ல மகா மனிதர்களும் மரணமடையக் கூடிய சந்தர்ப்பங்கள் ஏற்படலாம் என்பது நிழல் யுத்தத்தின் விதி. இதனால் தான் சிவராம் மட்டுமல்ல, கதிர்காமரும் மரணமடைந்தார். இந்த விதி மஹிந்த ராஜபக்ஷவுக்கும், ஜனாதிபதிக்கும் தெரியாவிட்டாலும் சர்வதேச சக்திகளுக்கு நன்றாகவே தெரிந்தது.

இந்தியா மட்டும் இதற்கு விதிவிலக்கு. இந்தியா தொடர்ச்சியான புலிக்காய்ச்சலில் இருக்கின்றது. அந்த புலிக்காய்ச்சல் தணியுமட்டும் சர்வதேச விழுமியச் செயற்பாட்டிற்குள் இந்தியா வரும் என எதிர்பார்க்க முடியாது. இந்தியர்கள் போரை இந்தியா வரை விஸ்தரித்தவர்கள். அதனால் ராஜிவ்காந்தியைப் பறிகொடுத்தவர்கள். எனவே, பீடித்த புலிக்காய்ச்சல் விரைவில் விட்டுப் போகும் எனக் கூறிவிட முடியாது. இந்தப் புலிக்காய்ச்சல் விடும்வரை பேரினவாதத்துடனான அவர்களது கைகோர்ப்பு தொடர்ந்து கொண்டேயிருக்கும்.

இந்த நிழல் யுத்தம் என்பது தமிழ்த்தேசம் தொடங்கிய யுத்தமல்ல - தமிழ்த்தேசம் மீது சிங்கள அரசாங்கத்தினால் திணிக்கப்பட்ட யுத்தம். இதுவும் சர்வதேச சக்திகளுக்கு நன்றாகத் தெரியும். சர்வதேச சக்திகளின் சமாதான நிகழ்ச்சி நிரலுக்கு இதுவரை காலமும் தமிழ்த்தேசம் ஒத்துழைத்து வந்ததே தவிர, சிங்கள தேசம் ஒத்துழைக்கவில்லை என்பதும் சர்வதேச சக்திகளுக்கு அனுபவ ரீதியாகத் தெரியும். அதுவும் ஒரு உச்ச நிலை அனுபவத்தை பொதுக் கட்டமைப்பு விவகாரம் அவர்களுக்குப் பெற்றுக்கொடுத்திருந்தது. எனவே, தங்களோடு ஒத்துழைக்கின்ற தமிழ்த் தேசத்தோடும் அதன் பிரதி நிதிகளோடும் ஒரு மோதல் நிலையினைப் பின்பற்ற சர்வதேச சக்திகள் விரும்பவில்லை. கதிர்காமர் கொலை தொடர்பாக ஒரு வேறுபட்ட அணுகுமுறைக்கு இவையே காரணம்.

இப்போது மீண்டும் எழுகின்ற கேள்வி கொலையை யார் செய்தார்கள்?

அண்மைக்காலமாக கதிர்காமர் பல்வேறு தரப்பட்டவர்களினாலும் விரும்பப்பட்ட ஒருவராக இருக்கவில்லை.

சர்வதேச சக்திகள் நகர்த்த இருக்கும் சமாதான நிகழ்ச்சி நிரலுக்கு பெருந்தடையாக இருக்கின்றார் என்பதற்காக அமெரிக்கா உட்பட சர்வதேச சக்திகளினால் விரும்பப்பட்ட ஒருவராக இருக்கவில்லை.

ஐ.தே.க.வின் வெளிநாட்டு நடவடிக்கைகளுக்கு சவாலாக இருக்கின்றார் என்பதனால் அக்கட்சியினால் விரும்பப்பட்ட ஒருவராக இருக்கவில்லை.

தான் நகர்த்த இருக்கின்ற பொதுக் கட்டமைப்பிற்கு எதிராக இருக்கின்றமையால் ஜனாதிபதியால் விரும்பப்பட்டவராக இருக்கவில்லை.

கதிர்காமரின் கதிரையில் தொடர்ச்சியாக கண் வைத்திருப்பதனால் ஜயந்த தனபாலவினால் விரும்பப்பட்டவராக இருக்கவில்லை.

பதவி நிலையில் தான் இரண்டாம் இடத்தில் இருக்கின்ற போதும், தன்னுடன் போட்டி போடக் கூடிய கவர்ச்சி நிலையில் இருப்பதனால் மஹிந்த ராஜபக்ஷவினால் விரும்பப்பட்டவராக இருக்கவில்லை.

தமிழ்த் தேசத்தின் அபிலாஷைகளுக்கு எதிரானவராக இரு
ந்ததனால் புலிகளினால் விரும்பப்பட்டவராக இருக்கவில்லை.

அவரை விரும்பியது ஜே.வி.பி. யினரும் இந்தியாவும் தான்.

இவ்வாறு பலரால் விரும்பப்படாத ஒருவராக இருக்கும் போது கொலைக்கு ஒரு தரப்புத்தான் காரணம் என எவ்வாறு உறுதியாகக் கூற முடியும்?

உயர் பாதுகாப்பு வலயத்தில் நடைபெற்ற சம்பவம் என்பதால் கூட்டு முயற்சிகளுக்கு வாய்ப்புகள் அதிகமாக இருந்திருக்கும். அப்படியானால் இதில் புலிகளின் பங்கு பற்றிய ஊகம் 1/5 ஆக மட்டுமே இருக்க முடியும். சிலவேளை விஷேட பங்கு புலிகளுக்கு இருந்திருக்கக் கூடும் என தர்க்கிக்கலாம்.

புலிகள் தான் இதில் விஷேட பாத்திரத்தை ஆற்றியிருப்பார்களானால், அவர்கள் மூன்று தெளிவான செய்திகளை சிங்கள தேசத்திற்கு கூறியிருக்கின்றார்கள்.

முதலாவது, கிழக்கினை உங்களால் குழப்ப முடியுமாயின் தெற்கினை எம்மால் குழப்ப முடியும்.

இரண்டாவது, நாங்கள் எப்போதும் போருக்குத் தயார்.

மூன்றாவது, எமது தலைவர்களை கொலை செய்துவிட்டு உங்களது தலைவர்கள் மட்டும் பாதுகாப்பாக இருக்க முடியாது.

உண்மையில் நிழல் யுத்தத்தின் வளர்ச்சியான தர்க்கமும் இதுவாகத் தான் இருக்கும்.

தனக்கு அதிர்ஷ்டம் கிடைத்து விட்டது என மஹிந்த ராஜபக்ஷ காற்றில் பறக்கலாம்.
பேரினவாத நிகழ்ச்சி நிரலில் இருந்து விலகிய ஸ்ரீலங்காவின் மைய அரசியலை பேரினவாத நிகழ்ச்சி நிரலிற்குள் கொண்டு வந்து விட்டோம் என ஜே.வி.பி. யினர் எக்காளம் போட்டு சிரிக்கலாம்.
ஆனால், யதார்த்த நிலையில் சிங்கள தேசம் தொடர்ச்சியாக தோல்விகளையே தழுவிக் கொண்டிருக்கின்றது.

இதுதான் சிங்கள தேசத்திற்கு ஏற்பட்ட மிகப்பெரிய சோகம்!

பிற தேசங்களை ஒடுக்கும் எந்தத் தேசமும் தோல்விகளைத் தழுவும் என்பதே இயக்க விதி! சிங்கள தேசம் மட்டும் இதற்கு எவ்வாறு விதிவிலக்காக இருக்க முடியும்.

நன்றி:- தினக்குரல்,கொழும்பு

மதம் பிடித்தலையும் மனிதர்களே!

இந்துமதத்தினை போற்றியொரு பதிவு.
இந்து மதத்தினை தூற்றியொரு பதிவு.
இஸ்லாத்தினை தூற்றியொரு பதிவு.
இஸ்லாத்தினை போற்றியொரு பதிவு.
ஏசுவை போற்றியொரு பதிவு.
ஏசுவை தூற்றியொரு பதிவு.

மதம் யானைக்கு மட்டும் தான் வரும்
என்று இருந்தேன்.
மனிதனுக்கு வழிகாட்டுவது தான் மதம்
என்று எண்ணியிருந்தேன்.ஆனால் இங்கு
மதம் மனிதனை மதம்கொள்ளச்செய்கிறதே.
இப்போது தான் தெரிகிறது ஏன் மதத்திற்கு மதம்
என்று பெயர்வைத்தார்கள் என்று.

இது பிடித்தால்
மனிதர்கள் என்னவெல்லாம் செய்வார்கள்
என்பதனாலாகுமோ?
எது நடக்கிறதோ அது நன்றாகவேநடக்கிறது
என்றாய் கீதையில் மதம் பிடித்த மனிதர்கள்
தலைகால் புரியாமல் பேசுகின்றனர்,எழுதுகின்றனர்.
மற்றைய மதமும் தன் மதம் போல்தான்.
காலத்துக்கு ஒவ்வாத விடயங்கள் ராமின்
மதத்திலும் உண்டு,
ரகீமிடத்திலும் உண்டு,ராபர்ட்டிடமும் உண்டு.தன்
முதுகுபார்க்க மறுப்பவர்கள்,தவறுபவர்கள் மற்றவர்
முதுகை அழுக்கு சுட்டும்
விந்தையை என்ன சொல்வது ?

ஆயிரத்தெட்டு அழுக்குகள் உம் முதுகு
மேலிருக்க மற்றவர் முதுகழுக்கு சுட்டும் மதம்
பிடித்த மனிதர்களே!
உங்கள் முதுகழுக்கு களைந்த
பின்னர் மற்றவர் முதுகழுக்கு சுட்டலாம் நெஞ்சு நிமிர்த்தி!.
மதத்தின் மேல் காதல் கொள்வீர்!.வேண்டாம் வெறி!.
அதுவரையில் இறைவனே இப்பாவிகளை
மன்னித்தருளும்!.